Netflix-ийн зар сурталчилгаа бүхий үйлчилгээ ирэх сарын 3 өдрөөс эхлэн 6.99 ам.долларын төлбөртэйгөөр хэрэглэгчдэд хүрнэ. Тус багц нь нэг цаг тутамд 4-5 минутын сурталчилгааг үзүүлэх бөгөөд хэрэглэгчид кино, телевизийн цуврал татаж авах боломжгүй байх юм. Сурталчилгаа тус бүр 15-30 секундийн урттай байна.
Netflix бол олон улсад 221 сая захиалагчтай, дэлхийн хамгийн том стриминг үйлчилгээ юм. Гэвч энэ онд үзэгч захиалагчдын өсөлтийн хурд эрс саарч байгаа тул ийнхүү хямд үнэтэй, реклам агуулсан үйлчилгээг компанийнхаа түүхэнд анх удаа санал болгохоос өөр аргагүй байдалд хүрчээ. Гэвч одоогоор хүүхдийн нэвтрүүлэг болон шинэ кинонд сурталчилгаа оруулахгүй харин бусад контентын эхлэл болон дунд хэсэгт реклам гаргахаар тооцоод байна.
Зар сурталчилгаа нийлүүлэгчдийн хувьд хүртээмжээ тооцож үзэхэд нь Nielsen үнэлгээний компани тусална. Nielsen 2023 оноос эхлэн Америкийн хэмжээнд дижитал үзэгчдийн стандарт хэмжүүр болсон digital ad ratings үзүүлэлтийг ашиглаж бизнес эрхлэгчдэд үр дүнгийн тайлан гаргаж өгөх болно. Netflix нь сурталчилгаат үйлчилгээндээ Microsoft компанитай хамтран ажиллаж байгаа гэв. Мөн сурталчилгааны боломжит орон зайгаа борлуулаад бараг дууссан хэмээн мэдэгдсэн юм.
Эх сурвалж: CNBC