Forbes Энэтхэгийн хамгийн чинээлэг 100 эрхмийн энэ оны шинэчилсэн жагсаалтыг гаргалаа. Тэдний хөрөнгийг нэгтгэн тооцвол нэг жилийн өмнөхөөс 25 тэрбум ам.доллароор нэмэгдэн 800 тэрбум ам.доллар давж байна.
Энэтхэгийн зах зээл тэлснээр Их Британийг гүйцэж түрүүлэн өдгөө дэлхийд тавдугаарт бичигдэх болсон. Хөрөнгийн зах зээлийн хувьд, нэг жилийн өмнөхөөс бараг өөрчлөгдөөгүй боловч рупийн ханш 10 орчим хувир суларсан байна.
Энэтхэгийн хамгийн чинээлэг эрхэм Гаутам Аданигийн хөрөнгө сүүлийн нэг жилийн дотор хоёр дахин нэмэгджээ. Харин өмнөх 2021 онд тэрбээр хөрөнгөө гурав дахин өсгөж чадсан билээ. Адани ирэх 10 жилд зөвхөн сэргээгдэх эрчим хүчний салбарт 70 тэрбум ам.доллар зарцуулна гэв. Жагсаалтын аман хүзүүнд Reliance Industry-ийг тэргүүлэгч Мукеш Амбани 88 тэрбум ам.долларын хөрөнгөтэйгөөр орлоо. Харин улсынхаа жижиглэн худалдааны салбарт тэргүүлэгч DMart сүлжээ дэлгүүрийн эзэн Радхакишан Дамани 27.6 тэрбум ам.долларын хөрөнгөтэй гуравдугаар жагсав. Мөн эмийн салбарын бизнесмен Сайрус Пүнавала ковидын эсрэг вакцин нийлүүлэн ихээхэн ашиг олсноор 21.5 тэрбум ам.доллартойгоор дөрөвдүгээр байрт бичигдэж байна.
Энэ жилийн хамгийн чинээлэг хөрөнгөтнүүдийн эрэмбэд есөн тэрбумтан шинээр нэмэгдсэн бөгөөд 101 дэх эрхэм 1.9 тэрбум ам.доллартойгоор “улаан шугам”-ын доор орж хасагдсан юм.
Эх сурвалж: Forbes