Apple-ийн анхны ухаалаг утас 2007 онд 599 ам.доллароор худалдаанд гарсан. Харин энэ сарын 16 өдөр LCG цахим дуудлага худалдаагаар борлуулахад 39,339 ам.доллар 60 центийн үнэд хүрлээ.
Одоогоос 15 жилийн өмнө үйлдвэрлэсэн тус ухаалаг утасны үйлдвэрийн лац хөндөгдөөгүй, 8GB багтаамжтай, 2 мегапиксел камертай бөгөөд 2007 оны шилдэг инновацын эзэн юм. Хачирхалтай нь, тус загварт AppStore байхгүй. Тиймээс зөвхөн үйлдвэрээс суулгасан Youtube, Safari, Weather аппликейшныг хэрэглэх болно. Мөн газрын зураг байгаа боловч GPS байхгүй тул хэрэглэгч байршлаа өөрөө шивж оруулах хэрэгтэй юм. Багтаамжийн хувьд одоогийн хэрэглээтэй харьцуулахад хэт бага буюу 8GB ажээ. Инфляцыг нэмж тооцвол 860 орчим ам.долларын үнэтэй анхны ухаалаг утсыг 39,000 орчим ам.доллароор худалдан авсан хэрэглэгч утсаа задлах уу, үзүүлэн болгон үүрд хадгалах уу гэдэг асуулт үлдэж байна.
Эх сурвалж: Gizmodo