Даваа гарагт Бразилын хөл бөмбөгийн од Неймар залилан болон авлигын хэргээр Испанийн Барселон хотын шүүхэд хүрэлцэн иржээ. Шүүхээс түүнийг мөн 8 шүүгдэгчийн хамтаар хэрэгт холбогдуулан шүүх болсон байна.

Яллагч талын зүгээс Парис Сент Жермен багийн тоглогчид нийт 2 жилийн ял оноож, 10 сая еврогийн торгууль ногдуулахаар төлөвлөсөн юм.

Харин хэргийн учрыг тодруулбал, хохирогчийн талаас Неймарыг Бразилын Сантос багаас Испанийн Барселон хөл бөмбөгийн клубт шилжихдээ гэрээнд заасан хэмжээний мөнгийг өгөлгүй залилан үйлдсэн гэж буруутгаж байгаа гэнэ. Тухайн үед Бразилын хөрөнгө оруулалтын DIS фирм Неймарын гэрээний 40 хувийн эрхийг эзэмшиж байсан ч тэрээр баг хооронд шилжихдээ DIS фирмд зохих хэмжээний ногдворыг өгөөгүй юм. Улмаар баг хооронд шилжихэд тэрээр 82 сая еврогийн гэрээ байгуулсан ч албан ёсны бичиг баримт дээр гэрээг 17 сая еврогоор тооцуулжээ.

Тийнхүү хэрэгт Неймараас гадна түүний эцэг эх, Сантос багийн ерөнхийлөгч асан Одилио Родригес, Барселон клубийн ерөнхийлөгч асан Жозеп Мариа Бартомю, Сандро Роселль нар шүүгдэж байгаа юм. Тэднээс хамгийн өндөр ял төлөвлөсөн шүүгдэгч нь Сандро Роселль бөгөөд яллагч талаас түүнд 5 жил хорих ял хийгээд 8.4 сая еврогийн торгууль ногдуулахаар төлөвлөөд байгаа гэнэ.

Үйл явдлын хүрээнд Неймар энэ долоо хоногийн баасан гарагт мэдүүлэг өгөх ажээ.

Эх сурвалж: DW