Олон улсын эрчим хүчний агентлагийн (ОУЭА) мэдээлснээр, энэ онд дэлхийн нүүрстөрөгчийн давхар ислийн ялгаруулалт өнгөрсөн оныхоос бага зэрэг нэмэгдэж, 33.8 тэрбум тоннд хүрэх төлөвтэй байна.

Ингэснээр өнгөрсөн онтой харьцуулахад 300 сая тонноор буюу 1 хувьд ч хүрэхгүй хэмжээгээр нэмэгдэж буй хэрэг бөгөөд 2021 онд өмнөх оноосоо хоёр тэрбум тонноор өсч байсан үзүүлэлттэй харьцуулахад нэлээд буурах хандлагатай байгаа юм.

ОУЭА-ийн мэдээлснээр эрчим хүчний үйлдвэрлэл болон нисэхийн салбар нүүрстөрөгчийн давхар ислийн ялгаруулалтын дийлэнх хэсгийг бүрдүүлсний дээр ОХУ Украинд халдан түрэмгийлснээс хойш байгалийн хийн үнэ огцом өссөнтэй холбоотойгоор олон улсад нүүрсний эрэлт нэмэгдсэн асуудал ч мөн үүнд багагүй хувь нэмрээ оруулсан болохыг онцлон тэмдэглэжээ.

Нар, салхины эрчим хүч үйлдвэрлэлийн хэмжээ түүхэн дээд хэмжээнд хүрсэн бөгөөд энэ хоёр эрчим хүчний эх үүсвэр байгаагүй бол нүүрстөрөгчийн давхар ислийн ялгаруулалт энэ онд өнгөрсөн жилтэй харьцуулахад нэг тэрбум тонноор нэмэгдэх байсан гэж ОУЭА нэмэлт тайлбар хийсэн байна.

Эх сурвалж: MBC