Хятад улсын аж үйлдвэрлэлийн салбарт тэргүүлэгчийн байр суурь ганхахад хүрээд байна. Шинжээчдийн үзэж байгаагаар Хятад улс цар тахлын эсрэг баримталж буй “Zero Corona” бодлогоос болж дэлхийн үйлдвэрлэл, экспортын зах зээлд эзлэх байр сууриа алдаж байгааг онцолжээ.
Орон нутгийн цагаар 20-ны өдөр CNBC агентлаг MDS Transmodal зөвлөх компаний мэдээллээс иш татан, Хятадад үйлдвэрлэсэн хувцас, дагалдах хэрэгсэл, гутал, тавилга, аялал жуулчлалын бараа зэрэг өргөн хэрэглээний бараа бүтээгдэхүүний экспортод эзлэх хувь буурч байгаа талаар мэдээлсэн байна.
Өнгөрсөн онд тавилгын эзлэх хувь 56% байсан бол энэ онд 53%, гутал 66% -аас 65%, аялалын барааны эзлэх хувь 71% -иас 70% болж буурчээ. Энэ нь Хятадын ”Zero Corona” бодлогын нөлөөгөөр үйлдвэрлэлийн үйл ажиллагаа нь доголдоход хүрсэн компаниуд Хятадаас хараат байдлаа бууруулах арай өөр хувилбарыг эрэлхийлэх болсонтой холбоотой бололтой.
MDS Transmodal компанийн ахлах зөвлөх Антонелла Теодор "Хятадын цар тахлын эсрэг баримталж буй бодлого үйлдвэрлэлд сөргөөр нөлөөлж, улмаар үйлдвэрлэгчид шинэ үйлдвэрлэлийн бааз хэрэгтэй гэдгийг ухаарсан” гэжээ.
Харин Хятадыг орлох нэг хувилбар болон Вьетнам улс хүч түрэн гарч ирж байна. Учир нь тус улс Хятадтай ойр хэрнээ ажиллах хүчний зардал хямд байдаг юм. Вьетнамын энэ оны экспортын хувь хэмжээ өмнөх жилтэй харьцуулахад тавилга болон бусад өргөн хэрэглээний барааны хувьд 1 пунктээр, аялал жуулчлалын бараа бүтээгдэхүүн мөн 1 пунктээр тус тус өссөн байна.
Дэлхийн тээврийн томоохон компани MSC өнгөрөгч 7-р сард Хо Ши Мин хотын ойролцоо чингэлэгийн шинэ терминалын төслийг гүйцэтгэхээр төлөвлөснөө зарласан билээ. "Тээвэрлэлтийн компаниуд шинэ зах зээл хайж хөрөнгө оруулалт хийсээр байна. Тэд эрэлт хэрэгцээг хүлээн зөвшөөрч, хөрөнгө оруулалтаараа зах зээлийг бий болгож байна” хэмээн компанийн удирдлагууд эна үеэр сэтгэгдлээ илэрхийлжээ.
Түүнчлэн Малайз, Бангладеш улсууд хувцас үйлдвэрлэлийн салбар дахь Хятадын байр суурийг эзлэж эхлээд байгаа юм. Мөн зарим металлургийн үйлдвэрлэгчид Тайванийг зорих болжээ.
Эх сурвалж: Newsis