Нидерландын Philips компанийн шинэ гүйцэтгэх захирал борлуулалт буурсан тул 4,000 орчим ажлын байраа цомхотгохоор шийдсэн гэж Даваа гарагт зарлалаа.

Тус компанийн эмнэлгийн тоног төхөөрөмж үйлдвэрлэгч салбар нь наймдугаар сард олон тооны амьсгалын төхөөрөмжөө зах зээлээс эргүүлэн татсан билээ. Түүнээс хойш борлуулалт эрс багассан аж. Мөн сүүлийн нэг жилийн хугацаанд компанийн зах зээлийн үнэлгээ 70 орчим хувиар буураад байгаа тул ийнхүү өргөн хүрээний цомхотгол хийхээр шийджээ. Philips-ийн гүйцэтгэх захирлын суудлыг хүлээж аваад дөнгөж нэг долоо хоног болж буй Рой Жейкобс “Манай компанийн борлуулалт, ашиг таван улирал дараалан буурсан. Удахгүй бэлэн болох гуравдугаар улирлын үзүүлэлт ч таатай үр дүн харуулна гэж бодохгүй байна. Бид суурь зардалтай тулж ажиллахаас өөр аргагүй. Бас байгууллагын бүтцийг илүү энгийн болгох хэрэгтэй байна. Харамсалтай боловч зайлшгүй шаардлагатай арга хэмжээ” хэмээн өгүүллээ.

Цомхотгол АНУ, Нидерланд дахь салбаруудад төвлөрнө. Тус компанийн өнгөрсөн оны мэдээллээс харахад 78,000 орчим ажилтантай юм. Өдгөө тэдний таван хувийг цомхотгох бөгөөд 300 сая орчим еврогийн зардал гарна гэж тооцож байна. Philips амьсгалуурын төхөөрөмжөө эргүүлэн татсанаар 1.3 тэрбум еврогийн цэвэр алдагдал хүлээсэн билээ.

Эх сурвалж: Reuters