Өнгөрөгч долоо хоногт Бээжин хотноо зохион байгуулагдсан Хятадын Коммунист намын Их хурлын үеэр Хятадын удирдагч асан Ху Жинтаог парламентын танхимаас албадан гаргасан хачирхалтай хэрэг гарсан билээ.

Тэгвэл Ху Жинтаог танхимаас гаргахаас өмнө юу болсныг үзүүлэх бичлэг бүрэн эхээрээ нийтэд хүрчээ.

Бичлэгт гарснаар засгийн газрын гишүүн Ли Жаншу удирдагч асан Ху Жинтаогийн өмнө байсан баримт бичгийг авч, түүнтэй ярилцаж байх юм. Тийнхүү тэднийг ярилцаж байхад Ши Жиньпин нэг хүнд удаа дараа заавар зөвлөгөө өгч, улмаар тухайн эр Ху Жинтаог танхимаас албадан гаргаж байх ажээ.

Үйл явдлын хүрээнд хүмүүс өөрсдийн таамгийг дэвшүүлэх болсон бөгөөд зарим хүний үзэж байгаагаар парламентын хурлын үеэр Ху Жинтаог хөөн гаргаж байгаа нь Ши Жиньпин Хугийн эрин үе дууссан болохыг үзүүлэх гэсэн эрх мэдлийн тоглолт гэсэн бол зарим хүн Ху Жинтаогийн биеийн байдлаас үүдэлтэй хэрэг хэмээсэн байна.

Синхуа агентлагаас мэдээлэхдээ Ху Жинтаогийн биеийн байдал базаахгүй байсан тул танхимаас албадан гаргасан гэж тайлбарласан ч дотооддоо энэ талаар дурдаагүй юм.

Гэвч одоогийн байдлаар танхимд яг юу болсон нь таамаг төдий л байгаа ажээ.

Эх сурвалж: BBC