Токио хотын захиргаанаас ижил хүйсийн хосуудад “хамтран амьдрагчийн гэрчилгээ” олгож эхэлжээ. Энэхүү гэрчилгээ нь зарим нийтийн үйлчилгээг авахад эсрэг хүйсийн хосуудад олгодог гэрлэлтийн баталгаатай адил үүрэгтэй үйлчлэх юм.
Олон нийтийн зүгээс энэхүү шийдвэрийг Япон улс бүхэлдээ ижил хүйсийн гэрлэлтийг хүлээн зөвшөөрөхөд нэмэр болох анхны алхам гэж найдаж байгаа ажээ.
Япон улсын хувьд “Их 7” бүлгийн гишүүдээс ижил хүйсийн гэрлэлтийг хүлээн зөвшөөрөөгүй цорын ганц улс юм.
Гэсэн хэдий ч саяхан хийсэн судалгаагаар япончуудын дийлэнх нь энэ төрлийн гэрлэлтийг дэмждэг гэсэн дүн гарчээ. Тодруулбал, олон нийтийн дунд явуулсан санал асуулгаар тэдний 57 хувь нь ижил хүйсийн гэрлэлтийг дэмждэг бол 37 хувь нь эсэргүүцсэн байна.
“Хамтран амьдрагчийн гэрчилгээг” өдгөө Япон улсын 8 мужид олгож байгаа юм. Улмаар энэхүү гэрчилгээг авсан хүмүүс нийгмийн халамж, эм тариа, байр авахад гэрчилгээг ашиглаж болох бол хүүхэд үрчилж авах, өв залгамжлах, гэрлэлтийн виз мэдүүлэхэд үйлчлэхгүй ажээ.
Тийнхүү шийдвэр гарсан даруй Модо Мамико болон Нагамура Сатоко нар энэхүү гэрчилгээг авсан анхны хос болсон байна.
Эх сурвалж: BBC