Аравдугаар сард Америкийн топ компаниудын хувьцааны ханш хэлбэлзсэнээр тэрбумтнуудын хөрөнгийн хэмжээг багагүй өөрчиллөө. Нэг сарын хугацаанд нийт 26 бизнес эрхлэгчийн хөрөнгө нэг тэрбум ам.доллар ба түүнээс дээш хэмжээгээр өссөн бол Марк Закерберг, Жефф Безос нарын хөрөнгийн хэмжээ хамгийн ихээр багасжээ.
Apple, Disney, Coca Cola зэрэг компанийн хувьцааг хянадаг Dow Jones индекс есдүгээр сард жилийн доод түвшинд хүрсэн боловч аравдугаар сард 14 хувиар эрчтэй өссөн бол харин S&P500 индекс найман хувиар, Nasdaq дөрвөн хувиар тус тус өсөлттэй байлаа. Ханш ийнхүү нэмэгдсэнээр өнгөрсөн нэг сарын хугацаанд Oracle-ийн үүсгэн байгуулагч Ларри Эллисоны хөрөнгө 16.6 тэрбум ам.доллароор буюу 19 хувиар нэмэгдсэн. Түүний компани наймдугаар сард цомхотгол хийн есдүгээр сарыг хүндхэн давсан боловч аравдугаар сард үр дүн гарч байна. Харин American Express, Coca-Cola, Chevron зэрэг хувьцааг нэгтгэсэн Berkshire Hathaway-ийн үүсгэн байгуулагч Уоррен Баффет өмнөх нэг сард 8.9 тэрбум ам.доллароор хөрөнгө нэмлээ. Мөн Nike-ийг үндэслэгч Фил Найт 2.9 тэрбум ам.доллароор өссөн бол Interactive Brokers платформын хувьцааны ханш сүүлийн нэг сард 26 хувиар нэмэгдсэн тул үүсгэн байгуулагч Томас Петерффайн хөрөнгө 5.5 хувиар өслөө.
Гуравдугаар улирлын тайлан мэдээлэл таагүй үзүүлэлттэй байсан тул технологийн тэргүүлэгч компаниуд болох Meta Platforms болон Amazon-ийн хувьцааны ханш унаж, улмаар Марк Закерберг, Жефф Безос нарын хөрөнгө буурлаа. Мөн хувьцааны үнэ унасны улмаас Илон Маск 24.7 тэрбум, Жефф Безосын экс эхнэр Маккензи Скотт 3.1 тэрбум, реппер Канье Уэст 1.6 тэрбум, Meta-ийн хамтран үүсгэн байгуулагч Дастин Московиц 1.6 тэрбум, Estée Lauder брэндийн өв залгамжлагч Леонард Лаудер 1.1 тэрбум ам.доллар тус тус алдлаа.
Эх сурвалж: Forbes