Технологийн салбарын ажилчдын хувьд хүндхэн өдрүүд үргэлжилж байна. Amazon шинээр ажилтан авахаа зогсоож, Stripe нийт ажилчдынхаа 14 хувийг цомхотгосон бол Twitter-ийн хүний нөөцийн тал хувь буюу 3,700 орчим хүн ажлаа алдах гэж байна.

Amazon хамгийн өндөр ашиг олдог зар сурталчилгааны салбартаа ч шинэ ажилтан элсүүлэхгүй байна. Тус компани эдийн засгийн байдлыг харзнан ойрын хэдэн сард шинэ ажилтан авахгүй бөгөөд зөвхөн ажлаас гарч буй зарим мэргэжилтний орон тоонд цөөн ажилтан авч магадгүй хэмээн мэдэгдлээ. Amazon есдүгээр сарын байдлаар дэлхий дахинд 1.5 сая хүнийг ажлын байраар хангаж байна. Харин онлайн төлбөр гүйцэтгэгч компани Stripe үйл ажиллагааны зардал нь хэт хурдан өссөний улмаас нийт ажилчдынхаа 14 хувийг цомхотгохоор шийдсэн хэмээн Пүрэв гарагт мэдээллээ. Улмаар 1,100 орчим хүн халагдах бол 7,000 гаруй ажилтан компанидаа үлдэнэ.

Twitter Inc компани 3,700 орчим ажилтнаа цомхотгох шийдвэрийн дэлгэрэнгүйг өнөөдөр буюу Баасан гарагт мэдээлнэ. Эдийн засгийн хэтийн төлөв тааруу байгаагаас технологийн бусад компани ажилтныхаа тоог цөөлөх арга хэмжээ авч байна. Google-ийн толгой компани Alphabet, Facebook-ийг эзэмшигч Meta компаниуд хүний нөөцийн зардлаа танах арга хэмжээ авч байгаа бол Alibaba, Netflix, Spotify, Coinbase, Shopify, Snap компаниуд цомхотгол хийхээ зарласан билээ.

Эх сурвалж: Bloomberg, CNBC