ХБНГУ-ын канцлер Олаф Шольцын Хятад улсад хийсэн айлчлалын үеэр Европын нисэх онгоц үйлдвэрлэгч Airbus компаниас 140 зорчигч тээврийн онгоц худалдан авах гэрээнд гарын үсэг зурлаа.
Энэхүү гэрээний хэмжээ 17 тэрбум ам.доллароор хэмжигдэж буй юм.
Орон нутгийн хэвлэл мэдээллийн хэрэгслүүдийн мэдээлснээр, Хятадын иргэний агаарын хөлгийн худалдан авалтад хяналт тавьдаг Хятадын нисэхийн тоног төхөөрөмжийн групп (Chinese Aviation Equipment Group) олон нийтийн сүлжээгээр дамжуулан ХБНГУ-ын канцлер Шольцын Хятадад хийсэн айлчлалын үеэр энэхүү гэрээг байгуулсан гэдгийг онцлон тэмдэглэсэн байна.
"Агаарын тээврийн зах зээл аажмаар сэргэж байгаа бөгөөд ирээдүйд ч хурдацтай өсөлтийг хадгалах болно. Тиймээс энэхүү өсөн нэмэгдэж буй эрэлт хэрэгцээг хангах зорилгоор авч буй арга хэмжээний нэг юм” хэмээн энэхүү шийдвэрийнхээ талаар компанийн зүгээс тайлбарлажээ.
Канцлер Шольц өчигдөр буюу 4-ний өдөр БНХАУ-д айлчлан тус улсын тэргүүн Ши Жиньпин болон Төрийн Зөвлөлийн ерөнхий сайд Ли Көцян нартай уулзаж, Украины хямрал, Тайванийн асуудлаар тогтохгүй хоёр орны эдийн засгийн хамтын ажиллагааны төлөвлөгөөний талаар ярилцав.
Өнгөрөгч 7-р сараас хойш Хятад улс Airbus компаниас хэд хэдэн удаа олон тоогоор бүтээгдэхүүн худалдаж авсан нь Америк, Хятадын өрсөлдөөн ширүүсч байгаа энэ үед өөрийн худалдан авах чадварыг олон улсын түвшинд харуулахын зэрэгцээ энэхүү бодлого нь Европын талд ашигтай байгаа нь ажиглагдаж байгаа юм.
Хятад улс Airbus компаниас зорчигч тээврийн онгоц худалдаж авахаар болсон нь тус компанийн өрсөлдөгч Boeing компанийн онгоц ээлж дараалан сүйрсэн зэрэг олон сөрөг үйл явдал нөлөөлсөн гэж дүгнэжээ.
Эх сурвалж: YTN