Бямба гарагт Польшийн эрх баригч намын тэргүүн Ярослав Качински Польш улсад төрөлт бага байгаа талаар ярьжээ. Тийнхүү яриандаа тэрээр төрөлт бага байгаа нь залуу эмэгтэйчүүдийн дунд алкоголийн хэрэглээ өндөр байгаатай холбоотой хэмээсэн байна.
Түүний хэлснээр, “Энэ асуудлын хүрээнд нээлттэй хэлэх хэдэн гашуун үнэн бий. Жишээлбэл, охид бүсгүйчүүд 25 нас хүртлээ үе тэнгийнхэнтэйгээ ижил хэмжээгээр алкоголь хэрэглээд байвал хэтийн ирээдүйд хүүхэд төрөхгүй.
Эр хүн 20 жил алкоголийн хэрэглээгээ хэтрүүлбэл архины хамааралтай болох бол эмэгтэй хүний хувьд энэ хугацаа ердөө 2 жил байдаг. Би хувьдаа эмэгтэйчүүдийн тэгш эрхийн асуудлыг үнэн голоосоо дэмждэг ч, эрэгтэй хүмүүс эмэгтэй хүн шиг аашилж, эмэгтэй хүмүүс эрэгтэй хүн шиг аашлахыг дэмжихгүй” гэжээ.
Ярослав Качинскигийн энэ үг Польш улс дахь эмэгтэйчүүдийн эрхийн төлөөх байгууллагуудын хилэнг төрүүлсэн бөгөөд даваа гарагт тэд ард иргэдийг “Хууль ба Шударга ёс” намыг эсэргүүцэн жагсахад уриалсан байна.
Эх сурвалж: AP News