Твиттер компанийн шинэ захирал, тэрбумтан Илон Маск “баталгаажсан хэрэглэгч”-ийн цэнхэр тэмдгийг сарын 7.99 ам.доллароор үнэлж, эхний ээлжид АНУ, Канад, Австрали, Шинэ Зеланд, Их Британийн хэрэглэгчдийн хүрээнд нэвтрүүлсэн ч хэдхэн хоногийн дараа шийдвэрээ өөрчилжээ.
Тодруулбал, Твиттер өнгөрөгч бямба гарагт энэхүү тэмдгийг 7.99 ам.доллароор үнэлж, iOS үйлдлийн систем бүхий ухаалаг утас хэрэглэгчдийн дунд шинэ хувилбараа гаргасан бол даваа гарагт тэд энэ үйлчилгээг хэрэглээнд нэвтрүүлэх хугацаагаа хойшлуулсан байна.
Учир шалтгааныг тодруулбаас сонгуулийн үеэр энэхүү тэмдгийг олгох журамд өөрчлөлт оруулах нь сонгуулийн үр дүнд шууд нөлөөлж магадгүй хэмээн болгоомжилсон юм.
Улмаар эх сурвалжийн мэдээлснээр үйлчилгээг хэрэглээнд нэвтрүүлэх хугацааг тэд 4 хоногоор хойшлуулжээ. Тийнхүү Твиттер энэ сарын 9-ий өдөр буюу лхагва гарагаас, сонгууль дууссан хойно, үйлчилгээг нэвтрүүлэх гэнэ.
Эх сурвалж: UNILAD