Саудын Арабын угсаа залгамжлах хунтайж Мохаммед бин Салман ирэх 10 жилийн хугацаанд Ойрхи Дорнод дахь ногоон санаачилгад 2.5 тэрбум ам.долларын хандив өгнө гэв.

Тэрбээр 2021 онд Ойрхи Дорнодын ногоон санаачилгыг бүсийн нүүрстөрөгчийн ялгарлыг бууруулах зорилгоор эхлүүлсэн юм. Улмаар тус сангийн цэвэр эрчим хүчний төслүүдийг хэрэгжүүлэхэд шаардлагатай 10.4 тэрбум ам.долларын 15 хувийг Саудын Араб гаргахаа тухайн үед мэдэгдсэн билээ. Түүнчлэн, Саудын Арабын Төрийн хөрөнгө оруулалтын сан 2050 он гэхэд хүлэмжийн хийн ялгарлыг тэг хувьд хүргэх зорилт тавиад байна.

Тус санаачилгын хүрээнд бүсийн нүүрсустөрөгчийн үйлдвэрлэлээс үүдэлтэй нүүрстөрөгчийн хийн ялгарлыг 60 гаруй хувиар бууруулах зорилго тавьсан. Тэрчлэн, Ойрхи Дорнодын нутагт 50 тэрбум мод тарьж, 200 сая га талбайг нөхөн сэргээхээр төлөвлөжээ. Тус санаачилга амжилттай хэрэгжвэл дэлхийн нүүрстөрөгчийн ялгарлын хэмжээ 2.5 хувиар буурах юм.

Эх сурвалж: Reuters