Дипломат асуудлаас үүдэн 1988 оноос хойш Парисын Ройси Шарль де Голль нисэх буудлын нэг хэсэгт амьдран суух болсон Мехран Карими Нассери 76 насандаа таалал төгсжээ.
1945 онд Иран улсын Кузестан аймагт төрсөн тэрээр анх Европ тивд ээжийгээ хайж олохоор ирж байсан юм. Гэвч түүнд зохих ёсны цагаачлалын бичиг баримт байгаагүйн улмаас тэр Их Британи, Герман, Нидерланд улсаас хөөгдөж, Бельгид хэдэн жил амьдарсны дараа Франц улсыг зорьжээ. Тийнхүү Мехран Францын нисэх буудал дээр амьдрах болсон байна. Улмаар 1999 онд Франц улсын зүгээс түүнд оршин суух зөвшөөрөл олгосон ч тэр 2006 оныг хүртэл нисэх буудал дээр амьдарч, тухайн жилдээ эмнэлэгт хүргэгдэж байсан юм.
Эмнэлгээс гарсан хойноо зочид буудал, хандивын төв, асрамжийн газар дамжин амьдарсан Мехран амьсгал хураахаасаа хэдэн долоо хоногийн өмнө нисэх буудалд эргэн ирсэн байна.
Нисэх буудлын урт сандлыг өөрийн гэр болгосон тэр өдөр хоногийг тэмдэглэл бичиж, ном уншиж өнгөрүүлдэг байсан юм.
Ташрамд дурдахад, 2004 онд түүний амьдралаас сэдэвлэн Терминал гэх киног бүтээсэн бөгөөд киноны гол дүрд жүжигчин Том Хэнкс тоглож байжээ.
Эх сурвалж: BBC