Дэлхийн хамгийн чинээлэг 10 эрхмийн нэг, Энэтхэгийн Reliance Industries конгломератын тэргүүн Мукеш Амбани Английн Liverpool клубийг худалдан авах сонирхлоо анх удаа илэрхийлж буй хэрэг биш.
Одоогийн эзэмшигч Fenway Sports Group тус клубээ 4 тэрбум орчим еврогоор үнэлэн хөрөнгө оруулалтын санал авах тухай мэдээлсний дараа Америк, Арабын Эмират зэрэг олон орноос санал ирсээр байна. Өдгөө 94 тэрбум орчим ам.долларын хөрөнгөтэй Мукеш Амбани өрсөлдөөнд нэгдлээ. Тэрбээр 2010 онд тус клубийг тухайн үеийн эзэмшигч Том Хикс, Жорж Гиллет нараас худалдан авахаар үнэ хаялцаж байсан ч одоогийн эзэмшигч Fenway Sports Group-д ялагдсан билээ.
Амбани энэ удаа Liverpool-ийг авч чадвал түүний спортын багцын гол “эрдэнэс” болно. Бүх Энэтхэгийн хөлбөмбөгийн холбооны түнш тэрбээр Энэтхэгийн Премьер лигийн крикетийн баг эзэмшдэг бөгөөд улсдаа дээд зэрэглэлийн хөлбөмбөгийн лиг байгуулах ажилд ихээхэн хувь нэмэр оруулсан юм.
Эх сурвалж: Quartz