Хаити улсад гэдэсний урвах тахал өвчин эрчимтэй тархах болж, нийт 700 гаруй тохиолдол батлагдан 160 орчим хүн тус өвчнөөр нас барсан тухай Пан-Америкийн эрүүл мэндийн байгууллагаас мэдээлжээ.
Албаныхны мэдээлснээр дээрх батлагдсан тохиолдлоос гадна нийт 7000 орчим сэжигтэй тохиолдол бүртгэгдсэн байгаа гэнэ. Улмаар урвах тахал өвчин энэ хэвээрээ эрчимтэй тархвал хагас сая хүн энэхүү өвчнөөр өвчлөх эрсдэлтэй байгаа ажээ.
НҮБ-ын зүгээс тус өвчний тархалтыг тогтоон барихаар Хаити улсад 150 сая орчим ам.долларын төсөв баталж өгсөн байна.
Энэ удаагийн тахлын анхны тохиолдол өнгөрөгч аравдугаар сард бүртгэгдсэн бөгөөд албаныхны хэлж байгаагаар Хаити улсад сүүлийн 3 жилийн хугацаанд урвах тахал өвчний тохиолдол бүртгэгдээгүй байжээ.
Урвах тахал өвчин нь Вибрио холера гэх бактери агуулсан хоол хүнснээс халдварладаг ба халдварласан тохиолдолд хэдхэн цагийн дотор амьсгал хурааж ч болдог юм.
Эх сурвалж: BBC