Долоодугаар сард Истанбул хотноо баталсан, Украинаас Хар тэнгисээр дамжуулан үр тариа экспортлох гэрээг нэмж 120 хоногоор сунгасан болохыг Туркийн Ерөнхийлөгч Р.Т.Эрдоган баталлаа.
Тэрбээр “НҮБ, Турк, ОХУ, Украины хооронд байгуулсан Хар тэнгисээр тээвэр хийх гэрээг 2022 оны арваннэгдүгээр сарын 19 өдрөөс эхлэн 120 хоногийн хугацаагаар үргэлжлүүлэн сунгах шийдвэрийг талууд баталлаа” хэмээн Twitter хуудсаараа дамжуулан олон нийтэд мэдээллээ. Улмаар НҮБ-ын тэргүүн А.Гутерриш, ОХУ-ын Ерөнхийлөгч В.Путин, Украины удирдагч В.Зеленский нарын нэрийг дурдан тус санаачилгад хүчин чармайлт гаргасан явдалд талархал илэрхийлэв. Харин А.Гутерриш “ОХУ-аас хүнс, бордоо экспортлоход тулгарч буй саадыг арилгах болно” хэмээн Оросын санал, шүүмжлэлд нааштай хариу өглөө. Хан тэнгисийн санаачилга анх хэрэгжиж эхэлснээс хойш тус замаар нийт 450 удаагийн хөлөгт тээврээр 11 сая гаруй метр тонн хөдөө, аж ахуйн бүтээгдэхүүн экспортлоод байна.
Эх сурвалж: ТАСС, Reuters