Нэрт хөрөнгө оруулагч, тэрбумтан Уоррен Баффеттын хөрөнгө оруулалтын компани Berkshire Hathaway Inc-ийн нэрийг барин ажиллаж буй криптовалютын брокерын вэбсайт байгааг анхаарууллаа. Тэрбээр тус крипто вэбсайттай огт хамааралгүй бөгөөд өөрийнх нь компанийн нэрийг барьж буйг сануулав.
Тус berkshirehathawaytx.com хэмээх вэбсайт танилцуулга дээрээ 2020 онд үүсгэн байгуулагдсан, Техас мужид байрладаг брокерын компани хэмээжээ. Түүнчлэн, хөрөнгө оруулагчдад “криптовалютын олборлолтод зарцуулсан хөрөнгө оруулалтаас пассив орлого олох боломж” олгоно хэмээн өөрсдийгөө тодорхойлсон байна. Тус брокер АНУ, Их Британи, Кипр, Өмнөд Африкт үйл ажиллагаа явуулдаг гэж бичжээ.
Дэлхийн тав дахь чинээлэг эрхэм болсон Уоррен Баффетт 1965 оноос хойш Berkshire Hathaway компаниа удирдаж байна. Тус компани есдүгээр сарын 30-ны байдлаар 306 тэрбум гаруй ам.долларын хувьцаа эзэмшиж байв. “Омахагийн зөнч” хэмээн нэрд гарсан алдарт хөрөнгө оруулагч Баффетт крипто хөрөнгөд итгэдэггүй хэмээн эртнээс мэдэгдсэн юм. Улмаар 2018 онд криптовалютыг “хархны аймшигт хор” хэмээсэн билээ.
Эх сурвалж: Reuters