Брүүклин Нетс багийн тоглогч Кайри Ирвинг еврейчүүдийг эсэргүүцэх үзлийг сурталчилсан агуулга бүхий киноны тухай жиргэснээсээ болж 8 тоглолт өнжих болсон билээ. Улмаар багийн удирдлагын зүгээс түүнд багтаа эргэн ирэхээс өмнө биелүүлэх ёстой зургаан жагсаалтыг ч гаргаж өгсөн юм.
Тэгвэл Кайри Ирвинг ням гарагт өгсөн ярилцлагынхаа хүрээнд олон нийтээс уучлалт гуйж, багтаа эргэн иржээ.
Түүний хэлснээр, “Би хэн нэг хүн эсхүл тодорхой хэсэг бүлэг хүмүүст ямар нэг хохирол учруулахыг хүсээгүй. Би үзэн ядалт бүхий яриа, еврейчүүдийг эсэргүүцэх үзэл хийгээд хүний гарал угсаагаар нь ялгаварлан гадуурхах явдлыг огтоос дэмждэггүй. Энэ бүхнийг эвээр шийдэх арга зам байсан ч тэгээгүйнхээ төлөө би энд хариуцлагаа хүлээх ёстой гэж бодож байна.
Энэ бол миний хувьд үнэхээр том мөч юм. Учир нь би энэ үйл явдлын хүрээнд өөрийнхөө дуу хоолойг ямар хүчтэй болохыг таньж мэдлээ. Миний нийгэмд үзүүлэх нөлөө ч маш хүчтэй юм. Тиймээс би үүнийхээ өмнө хариуцлагатай байхыг хүсэж байна” гэжээ.
Тийн мэдэгдсэний дараагаар Кайри Ирвинг багтаа эргэн ирж, Мемфис Гриззлис багийн эсрэг тоглолтод оролцсон байна. Тус тоглолтод Брүүклин Нетс баг 127 оноотойгоор ялалт байгуулжээ.
Эх сурвалж: BBC