Даваа гарагт ДЭМБ-ын Европ тивийг хариуцсан бүсийн дарга Ханс Хенри Пи Клюгегийн мэдэгдсэнээр энэ өвөл Украин улсын олон сая иргэний амь насанд заналхийлж байгаа ажээ.
Түүний мэдээлснээр өдгөө тус улсын эрчим хүчний дэд бүтцийн тал хувь нь эвдэрч, сүйдсэн бөгөөд 10 орчим сая хүн тус улсад эрчим хүчгүй амьдарч байгаа юм.
Доктор Ханс Хенри Пи Клюгегийн хэлснээр, “Энгийнээр хэлбэл, энэ өвөл [украинчууд] амьд үлдэхэд л төвлөрөх юм.
Украин улсын эрүүл мэндийн тогтолцоо түүхэн дэх хамгийн хар бараан өдрүүдтэй нүүр тулаад байна. Үүнийг зогсоох хамгийн оновчтой гаргалгаа нь дайныг дуусгах юм.
Түлш, ус, эрчим хүчний хомсдолоос үүдэн зуу зуун эмнэлэг, эрүүлийг хамгаалах байгууллагууд бүрэн хүчин чадлаараа ажиллаж чадахгүй байна. Төрөх тасагт инкубаторууд хэрэгтэй, нөөцөлсөн цусыг хадгалахад хөргөгч хэрэгтэй, эрчимт эмчилгээний тасагт амьсгалын аппарат хэрэгтэй. Энэ бүгд л эрчим хүчээр ажилладаг. Үүнээс үүдэн 3 сая гаруй хүн гэр орноосоо дүрвэж болзошгүй нөхцөл үүсээд байна” гэжээ.
Ташрамд дурдахад, хоёрдугаар сараас хойш ДЭМБ Украины эрүүл мэндийн дэд бүтцэд халдсан Оросын нийт 703 халдлагыг бүртгээд байгаа ажээ.
Эх сурвалж: BBC