Унгарын националист ерөнхий сайд Виктор Орбан ням гарагт Унгар, Грекийн хөл бөмбөгийн шигшээ багийн тоглолтыг үзэхдээ “Илүү агуу Унгар” гэх утга санаа бүхий ороолт зүүснээр хөрш орнуудынхаа хилэнг төрүүлээд авчээ.
Тодруулбал, ноён Орбаны зүүсэн ороолт дээр Унгар улсын газрын зургийг дүрсэлсэн байх авч газрын зургийг ажвал өнөөгийн Унгарын газар нутгийн хэмжээнээс хальсан үзэгдэх юм. Энэ нь Дэлхийн нэгдүгээр дайнаас өмнө, Унгар-Австри улс нэгдмэл байсан үеийн газар нутгийн зурагтай ижил байжээ.
Улмаар зургийг үзсэн Румын улсын зүгээс Виктор Орбаны үйлдлийг хурцаар шүүмжилж, Бухарест дэх Унгарын элчин сайдын яаманд захидал хүргүүлсэн байна. Харин Украин улсын зүгээс Виктор Орбаныг албан ёсоор уучлалт гуйхыг шаарджээ.
Үйл явдлын хүрээнд ноён Орбаны мэдэгдлийг үзвэл, “Унгар улсын шигшээ баг бол бүх унгар хүмүүсийн баг. Хөл бөмбөг бол улс төр биш. Хий зүйлс харахаа больцгооё” гэсэн юм. Түүний ийн хэлэх болсон шалтгаан нь Румын улсад 1.2 сая унгарчууд амьдардаг бол Украины баруун хэсгээр 150,000 унгарчууд амьдардагтай холбоотой ажээ.
Эх сурвалж: BBC