Twitter-ийн нийт ажиллах хүчний тал хувийг цомхотгосны эцэст Илон Маск ажилтан нэмж авахаар болсон тухайгаа “жиргэсэн” байна. Гэвч компанийн дотоод хурлаас задалсан тухайн мэдээлэлдээ “Бид шинэ ажилтан элсүүлнэ” гэх бичгээс өөр ямар нэг тайлбар өгсөнгүй.
Харин тус нийгмийн сүлжээн дэх хориотой үг хэллэгийн тоо, бусдын нэр, зургийг ашиглан дуурайх байдал эрс цөөрсөн болохыг мэдэгдсэн. Тэрчлэн, шинэ хэрэглэгчдийн тоо эрс өсөж буй аж. Тухайлбал арваннэгдүгээр сарын 16 хүртэлх нэг долоо хоногийн хугацаанд нэг хоногт шинээр бүртгүүлж буй хэрэглэгчийн тоо дунджаар хоёр сая давж шинэ дээд амжилт тогтоосон байна. Маск энэ тухайд “Twitter 12-18 сарын дотор сар тутам нэг тэрбум гаруй хэрэглэгч ханддаг болох арга замыг олж харлаа” хэмээн бичжээ. Twitter-ийн баталгаажсан хэрэглэгчийн цэнхэр тэмдэглэгээ ирэх Баасан гаргаас эхлэн төлбөртэй болно. Энэ нь хэрэглэгчдийг ангилах, орлого нэмэх зорилготой юм.
Эх сурвалж: Bloomberg