Өмнөд Солонгосын засгийн газар Энэтхэг улсад хурдны замын тээврийн системийг бүтээн байгуулахад зориулж 170 сая ам.долларыг олгохоор болжээ.
БНСУ-аас Энэтхэгт суугаа Элчин сайдын яамны мэдээлснээр, БНСУ-ын Элчин сайд Жан Жэ Бок, Энэтхэгийн Сангийн яамны туслах нарийн бичгийн дарга Ражат Кумар Мишра нар өнгөрөгч 30-ны өдөр Шинэ Дели хотноо орших Сангийн яамны байранд уулзах үеэрээ Нагпур-Мумбай хотыг холбосон хурдны замын ухаалаг тээврийн систем (ITS) төслийн гэрээнд гарын үсэг зурсан болохыг онцлон тэмдэглэв.
Энэхүү төслийн хүрээнд БНСУ-ын Засгийн газар Гадаад эдийн засгийн хамтын ажиллагааны сангаас (EDCF) 170 сая ам.доллар буюу ойролцоогоор 224 тэрбум воныг олгохоор болжээ.
Энэхүү төсөл нь хоёр талын эдийн засгийн хамтын ажиллагааг бэхжүүлэх арга хэмжээний нэг бөгөөд Энэтхэгтэй хамтран хэрэгжүүлж буй Гадаад эдийн засгийн хамтын ажиллагааны сангийн анхны төсөл юм.
Одоогийн байдлаар Энэтхэгийн эдийн засгийн хамгийн том хот болох Мумбай хотыг төв хэсэгт орших Нагпур хоттой холбосон 701 км урт хурдны зам барьж байгуулж байгаа аж.
Улмаар Энэтхэгийн засгийн газрын хүсэлтээр Өмнөд Солонгосын тал энэхүү бүтээн байгуулалтын ажилд замын хөдөлгөөний удирдлагын ухаалаг систем, төлбөр хураах системийг барьж байгуулах төлөвлөгөөтэй байна.
Энэтхэгийн засгийн газар Өмнөд Солонгосын Экспорт-Импортын банктай зээлийн гэрээ байгуулсны үндсэн дээр төслийн захиалга өгч, барилгын ажлыг эхлүүлэхээр төлөвлөжээ.
Эх сурвалж: SBS