Цар тахлын улмаас түр хугацаагаар зогсоогоод байсан хилийн бүс дэх төмөр замын ачаа тээврээ саяхан сэргээсэн Умард Солонгос болон ОХУ аялал жуулчлалын салбарт хамтран ажиллах гэрээ байгуулахаар төлөвлөж байгаа талаар орон нутгийн хэвлэлүүд мэдээлжээ.
ОХУ-ын өдөр тутмын Коммерсантъ сонин болон TАСС агентлагийн мэдээлснээр, тус улсын Приморийн хязгаарын засаг захиргаа болон Умард Солонгосын аялал жуулчлалын ерөнхий хорооны зүгээс аялал жуулчлалын салбарт хамтын ажиллагаагаа өргөжүүлэх гэрээ байгуулахаар судалж байгааг онцлов.
Энэхүү хэлэлцээрийн хүрээнд хоёр улсын хооронд аялал жуулчлалын маршрутын талаар мэдээлэл солилцох, аялал жуулчлалын шинэ маршрут гаргах, аялал жуулчлалын дэд бүтцийг бий болгоход хамтран ажиллах, үзэсгэлэн худалдаа зэрэг аялал жуулчлалын арга хэмжээ зохион байгуулах зэрэг асуудлыг тусгаж байгаа гэв.
Цар тахал дэгдэхээс өмнө ОХУ-ын жуулчид БНАСАУ-ын Гадаад хэргийн яамнаас зөвшөөрөл авсан аялал жуулчлалын агентлагуудаар дамжуулан Умард Солонгост аялах боломжтой байсан аж.
Гэвч Умард Солонгосын тал цар тахлаас урьдчилан сэргийлэх үүднээс 2020 оны хоёрдугаар сараас хойш ОХУ-тай хиллэдэг хилээ бүрэн хааж, хоёр талын төмөр замын тээвэр, зорчигч тээвэр ч мөн зогсоход хүрсэн билээ.
Гэвч БНАСАУ энэ оны эхний хагаст ОХУ-тай гадаад худалдаа, хамтын ажиллагаагаа сэргээхийг эрмэлзэж, улмаар өнгөрсөн сарын 2-ны өдөр буюу хоёр жил найман сарын дараа тус хоёр улсын төмөр замын ачаа тээврийн үйлчилгэж сэргэсэн юм.
Эх сурвалж: YTN