Пүрэв гарагт Твиттерийн гүйцэтгэх захирал Илон Маск хэд хэдэн жиргээ бүхий мэдэгдэл хийжээ. Түүний мэдэгдэлд өгүүлснээр лхагва гарагийн шөнө түүний хүү X Æ A-12-ын сууж явсан машин руу нэгэн үл таних этгээд халдсан байна.
Илон Маскийн нийтэлснээр, “Өнгөрөгч шөнө Лос Анжелес хотод миний хүү бяцхан X-ийн сууж явсан машиныг нэгэн галзуу этгээд дагаж, дараа нь машины урдуур хөндөлсөж зогсоож дээвэр рүү нь авирчээ.(Галзуу этгээд бодохдоо машинд намайг сууж яваа гэж бодсон)”, “Манай гэр бүлийг хохироох ажиллагааг дэмжсэн [Жак] Свийни болон түүний байгууллагын эсрэг хуулийн арга хэмжээ авахаар ажиллаж байгаа”, “Хэн нэгний яг хаана байгааг мэдээлсэн тохиолдолд хаягийг нь хаах болно. Учир нь энэ төрлийн мэдээлэл хувь хүний бие махбодын аюулгүй байдалд заналхийлж байдаг. Үүнд хүний бодит цагийн байршлын мэдээлэл бүхий сайтуудын холбоосыг нийтлэх ч багтана”, “Хэн нэгний аяллын тухай мэдээллийг бага зэрэг цагийн зөрүүтэй нийтэлж болно. Ингэснээр хүний аюулгүй байдалд заналхийлсэн болохгүй” гэсэн юм.
Жак Свийни бол алдартай, олны танил хүмүүсийн хувийн тийрэлтэт хөлгийн маршрутыг судалж, Твиттер хуудаснаа нийтэлдэг нэгэн билээ.
Эх сурвалж: UNILAD