Ням гарагт Бразил улсын нийслэл Бразилиа хотод ерөнхийлөгч асан Жэйр Болсонарогийн дэмжигчид үймээн дэгдээсний улмаар одоогийн ерөнхийлөгч Луис Инасио Лула да Силва энэ сарыг дуустал тус хотод онц байдал зарлах болжээ. Улмаар онц байдлын үед холбооны эрх баригчид олон нийтийн аюулгүй байдлын агентлагуудын үйл ажиллагааг удирдах гэнэ.
Ерөнхийлөгч да Силвагийн мэдэгдсэнээр ердийн үед олон нийтийн аюулгүй байдлыг хангах агентлагуудыг Холбооны цагдаагийн хэлтэс хариуцдаг ч тэд энэ удаагийн үймээний үеэр дорвитой зүйл хийгээгүй гэсэн юм. Мэдэгдлийн хүрээнд тэрээр хууль сахиулагчдын эл үйлдлийг шийтгэлгүй өнгөрч болохгүйг ч цохон тэмдэглэсэн байна.
Жэйр Болсонарогийн дэмжигчдийн хувьд өнгөрөгч аравдугаар сард болсон сонгуулийн үр дүнг хүлээн зөвшөөрөөгүйдээ тийн ням гарагт үймээн самуун дэгдээж, нийслэл хотдоо цагдаагийн алба хаагчидтай мөргөлдөн хэд хэдэн төрийн байгууламж руу дайран оржээ. Урьдчилсан мэдээгээр үймээн самуун дэгдээсэн жагсаалд нийт 5000 орчим хүн оролцсон гэнэ.
Эх сурвалж: ТАСС