Өнгөрөгч арванхоёрдугаар сарын дундуур Өмнөд Суданы ерөнхийлөгч Салва Киир нэгэн ёслолын арга хэмжээнд оролцож байхдаа өөрийн мэдэлгүй өмдөндөө шээж буй бичлэг цахим орчинд түгж, дэлхий дахины анхаарлыг татсан билээ. Тэгвэл бичлэг олны хүртээл болсон явдалд холбогдох албаныхан сэтгүүлч нарыг буруутган хорьсон байна.
Өмнөд Суданы Сэтгүүлчдийн Эвлэлээс мэдэгдсэнээр хэрэгт нийт 6 сэтгүүлчийг холбогдуулан баривчилсан гэнэ. Харин тэднийг ямар үндэслэлээр баривчилсан болохыг тодруулахад албаныхны зүгээс сэтгүүлчдийг ерөнхийлөгчийн өмдөндөө шээж буй бичлэгийг олон нийтэд задруулсан хэмээн буруутгаж байгаа гэсэн юм.
Үйл явдлын хүрээнд Твиттер хэрэглэгчид өөрсдийн үзэл бодлыг илэрхийлэх болсон бөгөөд нэгэн хэрэглэгчийн жиргэснээр, “Өмнөд Суданы ерөнхийлөгч өөрөө камерын өмнө зогсож байхдаа өмдөндөө шээсэн явдалд яагаад сэтгүүлчид шийтгэл хүлээж байгаа юм бэ? Энэ бол эрх мэдлээ урвуулан ашиглаж буй явдал” гэсэн бол өөр нэгэн хэрэглэгч, “Өмнөд Судан улс Хэвлэлийн Эрх Чөлөөний индексээрээ Энэтхэг улсын өмнө бичигддэг” хэмээжээ.
Эх сурвалж: UNILAD