Bloomberg News агентлагийн мэдээлснээр Apple компани утасгүй чип үйлдвэрлэгч Qualcomm-оор тогтохгүй Broadcom компанитай түншлэлээ зогсоох төлөвлөгөөтэй байгаа талаар онцолжээ.

Тус мэдээнд дурдсанаар Apple 2025 оноос эхлэн Broadcom компанийн чипийг ашиглахаа больж iPhone ухаалаг утсандаа өөрийн бүтээсэн чипийг суулгаж эхлэх гэнэ.

Өдгөө тус компани нь Broadcom-ын радио давтамжийн чипийг бүтээгдэхүүнүүддээ ашигладаг бөгөөд өнгөрсөн жил л гэхэд ойролцоогоор 7 тэрбум ам.доллароор хэмжигдэх бүтээгдэхүүнийг авсан аж.

Apple компани нь 2019 онд Intel-ийн модем чип үйлдвэрлэлийн бизнесийг худалдан авч утасгүй холболтод зориулсан чипийг бие даан хөгжүүлэх тал дээр ихээхэн идэвх зүтгэл гарган ажиллаж байгаа юм.

Apple компани өөрийн утасгүй чипийг хөгжүүлж байгаа тухай мэдээлэл цацагдсаны дараахан Нью-Йоркийн хөрөнгийн бирж дээр Broadcom компанийн хувьцаа 1.96 хувиар унажээ.

Эх сурвалж: MBC