Их Британи улсын зүгээс Оросын түрэмгийллийн эсрэг тэмцсээр буй Украинд 14 ширхэг “Challenger 2” байлдааны танк болон их бууны системийг нэмэлтээр илгээхээр шийджээ.
Тодруулбал Их Британийн Ерөнхий сайдын ажлын албанаас орон нутгийн цагаар 14-ний өдөр мэдээлснээр, ерөнхий сайд Риши Сунак Украины ерөнхийлөгч Володимир Зеленськийтэй утсаар холбогдох үеэрээ энэ мэтчилэн Украинд үзүүлэх дэмжлэгийг улам өргөжүүлэхээ амласан байна.
Ерөнхий сайд Сунак болон ерөнхийлөгч Зеленський нар сүүлийн үед болсон Украины армийн дараалсан ялалтууд нь ОХУ-ын зэвсэгт хүчний сэтгэл санаа хийгээд хүч чадал гээд бүхий л зүйлийг тарамдаж буй өнөөгийн нөхцөл байдлыг ашиглах нь нэн тохиромжтой гэдэг үзэл баримтлал дээр санал нэгдсэн гэж Ерөнхий сайдын ажлын албанаас мэдээллээ.
Тэрчлэн Ерөнхий сайдын ажлын албанаас гаргасан мэдэгдэлд дурдсанаар, тус улс ойрын хугацаанд Украинд 14 ширхэг “Challenger 2” танк болон 30 орчим “AS90” өөрөө явагч гаубицыг илгээхээр төлөвлөж байгаа гэв. Түүнчлэн Украины армийнханд эдгээр зэвсэг техникийг хэрхэн ашиглах талаарх сургалтыг тун удахгүй хийхээр төлөвлөжээ.
Эх сурвалж: MBC