АНУ-ын Сангийн сайд Жанет Йеллен хэрвээ өрийн таазыг нэмэгдүүлэхгүй бол АНУ дефолт зарлаж болзошгүй гэдгийг анхааруулжээ.
Орон нутгийн цагаар 21-ний өдөр сайд Йеллен өөрийн Twitter хуудаснаа "АНУ-ын хувьд 1789 оноос хойш бүхий л өр төлбөрөө үргэлж цаг тухайд нь төлж ирсэн бөгөөд энэ шалтгааны улмаас ч итгэж, найдаж болох улс орон гэдэг ойлголт дэлхийн санхүүгийн системд хадагдаж үлдсэн юм. Хэрэв дефолт зарлахдаа тулвал АНУ-ын эдийн засагт асар их хэмжээний хохирол учрах болно" гэж тэр хэлэв. Тодруулбал өнгөрөгч 19-ний өдөр АНУ-ын холбооны засгийн газрын нийт өрийн хэмжээ хуулиар тогтоосон дээд хязгаарт хүрсэнийг харгалзан санаа зовж буйгаа илэрхийлсэн нь энэ бололтой.
АНУ засгийн газрын өрийн хэмжээ дээд хязгаартай. Өмнө нь үүнтэй ижил эрсдэл тулгарахад ямар ч саадгүйгээр зохицуулчихаж болдог байсан бол энэ удаад тийм ч хялбархан шийдвэрлэж чадахгүй байж мэдэх юм. Тус улсын Конгрессын зүгээс АНУ-ын засгийн газрын зээлж болох мөнгөний хэмжээг хязгаарлах зорилгоор өрийн дээд хэмжээг тогтоосон бөгөөд одоогийн байдлаар өрийн дээд хэмжээ 31.4 их наяд ам.доллар байдаг аж. АНУ-ын зарим хэвлэлд мэдээлснээр Конгресс 1997-2022 он хүртэл өрийн дээд хэмжээг нийт 22 удаа нэмэгдүүлж, дефолт зарлах эрсдэлийг хялбархан шийдэж байсан гэв.
Харин яг энэ цаг үед Конгрессд олонх болоод буй Бүгд найрамдах намынхан дээр дурдсан аргын оронд засгийн газрынхаа зардлыг бууруулах нь зүйтэй хэмээн үзэж өрийн таазыг нэмэгдүүлэхээс татгалзаж байгаа юм. Үүний дагуу АНУ-ын Сангийн яам 19-ний өдрөөс эхлэн төрийн албанаас тэтгэвэрт гарч буй иргэдэд олгох тэтгэвэр, хөгжлийн бэрхшээлтэй иргэдийн халамж зэрэгт хамрагдах хүсэлтэй иргэдийн өргөдөл авах хугацааг хойшлуулах зэргээр дефолтоос бага ч болов зайлсхийх тусгай арга хэмжээг авч хэрэгжүүлж эхэлжээ. Гэхдээ энэ нь ирэх зургадугаар сар хүртэл хугацаа хожихоос өөрөөр ямар ч үндсэн шийдэл болж чадахгүй юм.
Эх сурвалж: Asiae