Уганда улсад Арсенал клубийн 8 фанат баривчлагджээ.

Ням гарагт Арсенал клуб, Манчестер Юнайтедын эсрэг тоглож, 3:2 харьцаатай хожсоноор даваа гарагийн өглөө Арсенал клубийн фанатууд Жинжа хотод баярын жагсаал зохион байгуулсан байна. Арсеналын өмсгөлийг өмсөж, Премьер лигийн дуураймал цомыг атгасан залуус таван машинаар цуваа үүсгэн баярлаж байхад цагдаагийн албаныхан тэднийг баривчилсан юм. Учир нь энэ төрлийн жагсаалыг зохион байгуулахад тусгай зөвшөөрөл шаардлагатай байдаг ажээ.

Баривчлагдсан этгээдийн өгүүлснээр, “Бид ердөө л Арсенал клубийн хожлыг тэмдэглэж байсан. Юу буруу хийснээ ч мэдэхгүй юм” гэсэн байна.

Харин цагдаагийн албанаас мэдэгдсэнээр, “Улирал дөнгөж талдаа орж байхад тэд юуны учир баярлаад байгааг бид ойлгохгүй байна. Тэднийг баярлаж байхад Манчестер Юнайтедын фанатууд сөргөлдөөн үүсгэсэн бол яах вэ?” гэжээ.

Эх сурвалж: BBC