АНУ-ын Худалдааны яамны зүгээс мэдэгдсэнээр өнгөрсөн оны дөрөвдүгээр улиралд дотоодын нийт бүтээгдэхүүн (ДНБ) жилийн 2.9 хувийн өсөлттэй байгааг зарлалаа.
Энэ нь Wall Street Journal сониноос гаргасан шинжээчдийн таамаглал буюу 2.8 хувиас бага зэрэг өндөр байгаа юм.
АНУ-ын эдийн засаг өнгөрсөн оны эхний болон хоёрдугаар улиралд сөрөг өсөлт үзүүлсэн явдлыг нэгэнтээ ардаа орхиж, өнгөрөгч 3, 4 улирал дараалан эерэг өсөлттэй гараад байна.
Түүнчлэн 2022 оны ДНБ-ий хэмжээг өмнөх онтой харьцуулахад 2.1 хувиар өссөн гэж Худалдааны яам мэдэгдэв.
АНУ нь эдийн засгийн өсөлтийн хурдыг урьдчилсан, явцын, эцсийн гэж үе шаттайгаар зарладаг билээ. Тэгвэл энэхүү таамаг маань урьдчилсан байдлаар гарсан хэмжээ учир ирээдүйд өөрчлөгдөхийг үгүйсгэхгүй.
Эх сурвалж: YTN