Олон жилийн турш хэрэглэгчид BAPE брэндийг спорт хувцас хэрэглэлийн Nike брэндийн загварыг хуулж байна хэмээн үзэж, яагаад тэднийг шүүхэд өгөхгүй байгааг гайхсаар ирсэн билээ.

Улмаар хэдэн жилийн өмнөөс BAPE брэнд Nike-ийн AJ1, AF1, Dunk загварыг дуурайлган бүтээж, худалдаанд гаргаснаар хэрэглэгчдийн эргэлзээ улам нэмэгдсэн юм. Тэгвэл үйл явдлын хүрээнд Nike брэнд лхагва гарагт шүүхэд гомдол мэдүүлжээ.

Шүүхэд өргөн барьсан гомдолд тэд брэндийнхээ пүүзнүүдийг BAPE брэндийн пүүзнүүдтэй харьцуулсан харьцуулалтыг хавсаргасан байна. Тодруулбал, тэд Bape Sta-Air Force 1, Bape Sta Mid-Air Force 1 Mid, Sk8 Sta-Dunk, Court Sta High-Air Jordan 1, Court Sta-Air Jordan 1 Low зэрэг пүүзнүүдийг хооронд нь харьцуулан үзүүлжээ. Мөн тэдний мэдэгдлийн дагуу бол Nike брэнд пүүзнүүдийн загварын тухай BAPE брэндтэй 2009 онд ярилцсан бөгөөд уулзалтын хүрээнд BAPE брэнд АНУ дахь үйл ажиллагаагаа хумьж, дэлгүүрүүдийнхээ үүд хаалгыг барьсан байна. Гэвч BAPE 2016 онд Bape Sta-ийн загварыг өөрчилж, 2021 онд оргинал хувилбарыг худалдаанд дахин гаргажээ. Тиймээс Nike брэнд шүүхэд гомдол гаргасан байна.

Эх сурвалж: Complex