АНУ-ын мэдээллийн технологийн салбарынхан ажлын байрны цомхотголыг өргөн хүрээтэйгээр хийж буй энэ үед цахим төлбөрийн үйлчилгээ үзүүлэгч PayPal компани ч нийт ажилчдынхаа 7 хувь буюу 2000 орчим ажилтнаа эдийн засгийн өсөлт саарч буйн улмаас цомхотгох шийдвэр гаргаснаа орон нутгийн цагаар 31-ний өдөр зарласан байна.
Bloomberg News агентлагийн мэдээлснээр, PayPal-ын гүйцэтгэх захирал Дан Шульман мөн өдөр ажилчдадаа энэ тухай сануулж хэлсэн бөгөөд ойрын хэдэн долоо хоногтоо уг шийдвэрийг хэрэгжүүлэхээ мэдэгджээ.
"Бид зардлын задаргааг оновчтой схемчлэх тал дээр санал санаачлага гарган ажиллаж, стратегийн үндсэн үйл ажиллагаандаа гол анхаарлаа төвлөрүүлж байгаа ч одоог хэр нь эцэслэн шийдвэрлэх асуудлууд байсаар байна” хэмээн тэрээр цохон тэмдэглэсэн байна.
PayPal компани нь бусад технологийн компаниудын нэгэн адил цар тахлын ид үед онлайн худалдаа нэмэгдэхийн хэрээр ажиллах хүчээ нэмэгдүүлсэн боловч улс орнууд хэвийн амьдралдаа эргэн орж хэрэглэгчид уламжлалт байдлаар худалдан авалт хийх болсноор тус компанийн ашиг орлого эрс муудаад байгаа аж.
Өнгөрсөн онд хэрэглэгчид тус компаниар дамжуулан 1.4 их наяд ам.долларын төлбөр тооцоог хийсэн нь 9.6 хувиар өссөн үзүүлэлт боловч Paypal олон нийтэд нээлттэй компани болсноос хойших хамгийн бага өсөлт болсныг Bloomberg агентлаг дурджээ.
Тиймээс PayPal компанийн зүгээс тус компаниар дамжих төлбөр тооцооны хэмжээ багасч, хувьцааных нь үнэ огцом унасан зэргийг харгалзан АНУ дахь ажлын байрыг цомхотгох, оффисуудаа хаах зэргээр зардлаа бууруулна гэдгээ мэдэгдсэн билээ.
Дээрх шийдвэрийнхээ ачаар өнгөрсөн онд 900 сая ам.долларыг хэмнэсэн бол энэ жил 1,3 тэрбум ам.доллар хэмнэх тооцоог гаргаснаа гүйцэтгэх захирал Шульман онцолжээ.
Мөн өдөр Нью-Йоркийн хөрөнгийн бирж дээр PayPal-ын хувьцаа 2.32 хувиар өссөн байна.
Эх сурвалж: YTN