Европын хөл бөмбөгийн Манчестер Юнайтед клубийн эзэд болох Глэйзерийн гэр бүл энэ сарын 17-ы өдрийг хүртэл хөрөнгө оруулалт, худалдааны үнийн санал хүлээн авах болсон билээ.

Тэдний зүгээс өнгөрөгч оны арваннэгдүгээр сард клубээ зарах эсэх талаар авч үзэхээ мэдэгдэж байсан бол энэ сард тийнхүү боломжит худалдан авагч нараас үнийн санал сонсох болсон байна. Тэгвэл тус үйл явцыг тэрбумтан Илон Маск маш сайтар ажиглаж байгаа гэсэн мэдээлэл түгэх болжээ. Түүний зүгээс урьд хөл бөмбөгийн клуб худалдан авах болбоос Манчестер Юнайтед клубийг л авах болно хэмээн мэдэгдэж байсан юм.

Алдартнуудын тухай мэдээллийг хүргэдэг Daily Mail цахим сэтгүүлээс мэдээлснээр ноён Маск тус клубийг худалдан авахаар 5.4 тэрбум ам.долларын үнэ санал болгосон гэжээ. Дэлхийн хамгийн хөрөнгөлөг эрхмүүдийн нэг болох Илон Маскаас гадна тус клубийг худалдан авах сонирхолтой хэд хэдэн хүн байгаагаас дийлэнх нь Саудын Арабын хөрөнгөтнүүд гэнэ. Тэдний зүгээс худалдаа, хөрөнгө оруулалтын хүрээнд Манчестер Юнайтед клубтэй нууцлалын гэрээ байгуулсан гэх сураг ч байгаа бөгөөд Глэйзерийн гэр бүл клубийг 7.3 тэрбум ам.доллароор худалдах сонирхолтой байгаа гэсэн мэдээлэл байгаа юм.

Эх сурвалж: Front Office Sports