1.4 сая ам.доллароор хэмжигдэх виртуал валюттай Умард Солонгосын хакерын байгууллагын дансыг царцаахын тулд виртуал валютын томоохон биржүүд хамтран ажилласан тухай Radio Free Asia агентлаг мэдээлэв.

Тодруулбал тус агентлаг нь Их Британийн блокчэйн компаниудын шинжилгээний Elliptic Enterprises фирмийн сайтнаас иш татан мэдээлснээр, өнгөрөгч 14-ний өдөр виртуал валютын арилжаа, үйл ажиллагаагаараа дэлхийд тэргүүлэгч Binance болон Huobi биржүүд хамтран Умард Солонгосын засаг захиргаатай холбоотой Lazarus хакерын байгууллагын хакердаж хулгайлж олсон виртуал валютаа байршуулсан дансыг царцаасан тухай онцлон тэмдэглэжээ.

Lazarus хакерын байгууллагын энэхүү царцаасан дансанд ойролцоогоор 1.4 сая ам.доллароор хэмжигдэх виртуал валют байсан бөгөөд энэ нь өнгөрсөн оны зургадугаар сард блокчейн технологийн Harmony компаниас хакердаж хулгайлсан 100 сая ам.долларын үнэ бүхий криптовалютын нэг хэсэг болох нь батлагдсан аж.

Elliptic Enterprises фирмийн зүгээс "Lazarus-ын хакердаж олсон виртуал валют нэлээд төвөгтэй гүйлгээний явцад дээрх дансанд орж ирснийг бид илрүүлсэн. Улмаар үйл ажиллагаа явуулж буй биржүүдэд түргэн шуурхай мэдэгдэж дансыг битүүмжилж, дансан дахь виртуал валютыг царцаах арга хэмжээг авч чадлаа" хэмээн нэмж тайлбар хийсэн байна.

Эх сурвалж: SBS