Биткоиныг үндэсний мөнгөн тэмдэгтээ болгосон анхны улс Эль Сальвадор их хэмжээний биткоин худалдан авснаар олон сая долларын алдагдал хүлээсэн ч тус улсын ерөнхийлөгч Найиб Букеле АНУ-ын Техас мужид “Биткоины элчин” нээхээр төлөвлөх болжээ.
Энэ талаар Эль Сальвадорын АНУ-д суугаа элчин сайд Милена Майорга Техас мужийн нарийн бичгийн даргын орлогч Жое Эспарзатай ч ярилцаад амжсан байна. Одоогийн байдлаар тус элчин яг ямар үйл ажиллагаа явуулах нь олон нийтэд тодорхойгүй байгаа ч Майоргагийн итгэж байгаагаар энэхүү элчний газрыг нээснээр хоёр улсын хоорондох худалдаа, эдийн засгийн солилцооны төслүүд өргөжих гэнэ.
Эль Сальвадор улсын хувьд өөр улсад “Биткоины элчин” нээх гэсэн анхны оролдлого нь энэ биш бөгөөд тэд урьд Швейцарын Лугано хотод “Биткоины элчин” нээхээр судалж байсан юм.
Гэсэн хэдий ч судалгаагаар тус улсын ард иргэдийн ердөө 55 хувь нь интернет ашигладаг, бизнесийн байгууллагуудын 86 хувь нь биткоиноор гүйлгээ хийж үзээгүй гэсэн тоо гарчээ.
Эх сурвалж: Gizmodo