ОХУ Украинд халдан түрэмгийлсний нэг жилийн ой тохиосон энэ сарын 24-ний өдөр Япон улсын зүгээс Оросын эсрэг нэмэлт хориг арга хэмжээ аваад зогсохгүй Украинд нэмэлт тусламж үзүүлэхээр төлөвлөж байгаагаа зарлав.
Тодруулбал Украины ерөнхийлөгч Володимир Зеленськийн оролцсон “Их 7”-гийн бүлгийн удирдагчдын цахим дээд хэмжээний уулзалтын үеэр Японы засгийн газар Оросын 120 гаруй хувь хүн, аж ахуйн нэгжийн хөрөнгийг царцаах нэмэлт хориг арга хэмжээ авахаар болсныг Японы ерөнхий сайд Фумио Кишида мэдэгдлээ.
Түүнчлэн нисгэгчгүй нисэх төхөөрөмжтэй холбоотой эд анги зэрэг ОХУ-ын аж үйлдвэрлэлийн салбарын хөгжилд нэмэр болохуйц аливаа бараа бүтээгдэхүүний экспортод тавих хоригийг өргөжүүлэх төлөвлөгөөгөө мөн энэ үеэр мэдэгдсэн байна.
Тус улсын засгийн газрын зүгээс Украинд 5,5 тэрбум ам.долларын нэмэлт санхүүгийн дэмжлэг үзүүлэхээ амлав.
Ерөнхий сайд Кишида "Оросын түрэмгийлэл бол олон улсын хууль журмыг зөрчсөн зөвтгөх аргагүй үйлдэл юм. Бид ОХУ-ын эсрэг хориг арга хэмжээ авч, Украиныг дэмжих замаар Оросын түрэмгийллийг зогсоож, хууль дээдлэх зарчмаар олон улсын дэг журмыг сахин хамгаалах болно” хэмээн цохон тэмдэглэсэн байна.
Эх сурвалж: MBC