Сэндлигийн хамт олон ирээдүйн тогтвортой өсөлтийг хадгалах зорилгоор компанийн үнэт зүйл болсон ажилчдадаа хувьцаа эзэмшүүлэх хөтөлбөрийг баталж, энэ хүрээнд “Сэндли эмплойе” ХХК-ийг 2022 онд байгуулжээ.
“Сэндли эмплойе” ХХК нь “Сэндли ББСБ” ХК-ийн нийт хувьцааны 8.95 хувийг эзэмшдэг бөгөөд энэ удаа компанийнхаа 42%-тай тэнцэх хувьцааг ийнхүү тарааж байна. Харин ирэх жилүүдэд үлдсэн 58%-тай тэнцэх хувьцааг үе шаттай тараахаар төлөвлөжээ.
“Амжилттай ажиллаж буй аливаа компани ажилтнууддаа хувьцаа олгож, урамшуулдаг нь олон улсын тогтсон жишиг. “Сэндли” ийнхүү ажилтнуудаа компанийн хувьцаа эзэмшигч болгосноор байгууллагынхаа үнэ цэнийг хамтдаа өсгөх, цаашлаад үр шимийг нь үр хүүхдүүд нь ч хүртэх боломжтой урт хугацааны бодлого юм” хэмээн тус компанийн ТУЗ-ийн дарга Б.Наранбат онцоллоо.
“Сэндли ББСБ” ХК нь өнгөрсөн оны есдүгээр сард нийт хувьцааныхаа 29.9 хувийг олон нийтэд эзэмшүүлсэн. Мөн 2023 оны анхны нээлттэй бондыг Монголын хөрөнгийн бирж дээр амжилттай арилжаалж, төлөвлөгөөгөө 1 цагийн дотор биелүүлж, олон нийтээс 8.5 тэрбум төгрөг татан төвлөрүүлсэн юм.
Монгол Улсад анхны бие даасан олон улсын мөнгөн гуйвуулгын үйлчилгээг нэвтрүүлсэн тус компанийн “Сэндли” аппликейшн нь Америк, Австрали, Япон, мөн Европын 27 улсад нэвтэрч, хэрэглэгчид 10 минутын дотор хамгийн бага шимтгэлээр мөнгөн гуйвуулга хийх боломжийг бүрдүүлсэн.
Өдгөө “Сэндли ББСБ” ХК нь орон нутагт 48, Улаанбаатар хотод 6 салбартай үйл ажиллагаа явуулж байгаа бөгөөд компанийн үнэт зүйлс болсон ажилтнуудаа тав тухтай орчинд ажиллуулж, дэлхийг хэрэх финтек компани болох зорилгодоо төвлөрч ажиллаж байна.
