Аргентины хэрэглээний үнийн индекс (ХҮИ) өнгөрөгч хоёрдугаар сард 100 гаруй хувиар өссөн нь 1991 оноос хойших 32 жилийн хугацаанд анх удаа гурван оронтой тоонд хүрсэн явдал болов.

Тодруулбал орон нутгийн цагаар 14-ний өдөр Аргентины Үндэсний статистикийн хороо (INDEC) өнгөрөгч хоёрдугаар сард ХҮИ өнгөрсөн оны мөн үетэй харьцуулахад 102.5 хувиар өссөн хэмээн мэдэгдсэн юм. Зөвхөн тус сард л гэхэд ХҮИ 6.6 хувиар өссөн явдал нь зах зээлийн 6 хувийн хүлээлтээс давсан байна. Хамгийн их өсөлт хүнсний бүтээгдэхүүнүүд дээр ажиглагдсан бөгөөд нэг сарын өмнөхөөс бараг 10 хувиар өсчээ. Bloomberg агентлагийн мэдээлснээр, хүнсний гол нэрийн бүтээгдэхүүний нэг болох үхрийн махны үнэ өнгөрсөн сард нийслэл Буэнос-Айрес хот орчмын бүсэд 35 хувиар өссөн болохыг онцлов. Инфляцын түвшин хэт өндөр байгаагийн улмаас бараа бүтээгдэхүүний үнэ долоо хоног бүр нэмэгддэг гэжээ.

Хүн амын 40 орчим хувь нь ядууралтай тэмцэж байгаа энэ үед инфляцын өсөлт нь бодит цалинг улам бүр үнэгүйдүүлж, эдийн засгийг сүйрүүлж байна гэж Bloomberg агентлаг цохон тэмдэглэв. Сүүлийн 60 жилд тохиолдоогүй ган гачиг, экспортын гол бүтээгдэхүүн болох эрдэнэ шиш, улаан буудай зэрэг үр тарианы ургац муу байгаа нь байдлыг улам хүндрүүлж байгаа аж.

Ерөнхийлөгч Альберто Фернандесын зүгээс жилийн өмнө "инфляцын эсрэг дайн" зарлаж, улмаар бараа бүтээгдэхүүний үнийг богино боловч хугацаанд царцаах зорилгоор “шударга үнэ"-ийн бодлогыг хэрэгжүүлснээс гадна үр тарианы экспортыг хязгаарлах зэрэг олон арга хэмжээг авч хэрэгжүүлсэн ч тийм ч үр дүнтэй байж чадаагүй юм. Аргентин нь Өмнөд Америкийн хоёр дахь том эдийн засагтай улс хэдий боловч 1980-аад оны өрийн хямралаас хойш архаг гиперинфляцид өртөж, эдийн засгийн тогтворгүй байдал урхагшсан гэхэд болно.

Эх сурвалж: Kyunghyang