Аргентин улс дахь инфляц сүүлийн 30 орчим жилийн хугацаанд анх удаагаа 100 хувийг давжээ. Тодруулбал, тус улс дахь инфляцын түвшин хоёрдугаар сард 102.5 хувьд хүрсэн байна.

Үүнийг 2022 оны эхэн үетэй харьцуулбал, тус улсад худалдаалагдаж буй бараа бүтээгдэхүүнийг үнэ даруй хоёр дахин өссөн ажээ.

Аргентин улсын хувьд сүүлийн жилүүдэд эдийн засгийн маш хүнд нөхцөлд байгаа бөгөөд засгийн газар нь хүнсний болон бусад бараа бүтээгдэхүүний үнэд хязгаар тогтоосон ч дорвитой үр дүнд хүрэхгүй байгаа юм. Улмаар энэ оны эхний нэг, хоёрдугаар сарыг харьцуулбал, тус улсад худалдаалагдаж буй хүнс хийгээд уух зүйлсийн үнэ сарын дотор 9.8 хувиар өсжээ.

Аргентин улсын хэвлэлүүдийн мэдээлж байгаагаар энэхүү огцом өсөлт нь махны үнийн огцом өсөлт, цаг агаарын хүнд нөхцөл байдалтай холбоотой байж магадгүй гэнэ. Гэвч үнийн өсөлтөд нөлөөлж байгаа хүчин зүйл дээрх хоёр шалтгаанаар тогтохгүй ажээ.

Эх сурвалж: BBC