Энэ сарын 20-22-ны өдрүүдэд ОХУ-д төрийн айлчлал хийх гэж буй БНХАУ-ын дарга Ши Жиньпин ерөнхийлөгч Владимир Путинтэй уулзах үеэрээ Украины нөхцөл байдал болон хоёр талын цэрэг техникийн хамтын ажиллагааны талаар хэлэлцэнэ гэж Оросын тал мэдэгдэв.

Орон нутгийн цагаар 17-ны өдөр ТАСС агентлагийн мэдээлснээр, Кремлийн ордны Гадаад харилцааны зөвлөх Юрий Ушаков хэвлэлийн бага хурал хийлгэх үеэрээ “Мэдээж Украины нөхцөл байдлын талаар ярилцах нь тодорхой бөгөөд Хятад улсын хувьд энэхүү асуудалд хүлээцтэй, ухаалаг байр суурьтай байгааг бид өндрөөр үнэлж байна" хэмээн цохон тэмдэглэжээ.

Тэрээр үргэлжлүүлэн “Хоёр улсын төрийн тэргүүнүүд Украины хямралын цаашдын хийгээд өнөөгийн нөхцөл байдлын талаар санал бодлоо солилцоно. Энэхүү асуудлын хүрээн дэх Хятад болон Оросын байр суурь үндсэндээ ижил байгаа” хэмээн дурдав.

Үүнээс гадна “Цэрэг-техникийн хамтын ажиллагааны хөтөлбөрийг хэлэлцэх тодорхой асуудал юм. Түүнчлэн эрчим хүчний асуудлыг ч мөн нарийвчлан авч үзэх нь дамжиггүй” гэж тэрээр нэмэлт тайлбар хийсэн байна.

Ши Жиньпин дарга Путины урилгаар энэ сарын 20-22-ны өдрүүдэд ОХУ-д төрийн айлчлал хийж, хоёр орны харилцаа, олон улс, бүс нутгийн томоохон асуудлуудыг хэлэлцэнэ гэж Орос, Хятад хоёр өмнө нь мэдэгдэж байсан билээ.

Эх сурвалж: MBC