Итали хувцас загварын Moschino брэндийн бүтээлч ажиллагаа хариуцсан дарга Жереми Скотт 10 жил тус албыг хашсаны эцэст ажлаа хүлээлгэн өгөх болжээ.
Энэ талаар даваа гарагт Moschino брэнд өөрсдийн Инстаграм хуудсаар дамжуулан мэдэгдсэн байна. Moschino брэндийн толгой компани болох Aeffe-ийн гүйцэтгэх захирал Массимо Ферреттигийн хэлснээр, “Надад Жереми Скотт гэх бүтээлч хүнтэй хамтран ажиллах завшаан олдсон нь маш азтай хэрэг. Миний зүгээс түүний Франко Мошиногийн байшинд үнэнчээр зүтгэсэн 10 жилд талархал илэрхийлмээр байна. Түүний хөгжилтэй, өвөрмөц алсын хараа үүрд мөнх Moschino брэндийн түүхийн нэг хэсэг байх болно” гэсэн юм.
Үйл явдлын хүрээнд Жереми Скоттын зүгээс ч өнгөрсөн 10 жилийн ажлаа дүгнэсэн бөгөөд тэр, “Moschino-д өнгөрүүлсэн сүүлийн 10 жил бүтээлч байдал хийгээд уран төсөөллийг тэмдэглэсэн гайхалтай жилүүд байлаа. Би ард минь үлдэж байгаа өвөөр маш их бахархаж байна” гэжээ.
Эх сурвалж: People