Орон нутгийн цагаар 21-ний өдөр Google компани интерактив хиймэл оюун ухаан дээр суурилсан “Bard” чатботыг гаргалаа.

Энэхүү чатбот нь сүүлийн үед олон хүний анхаарлыг татаж буй яг л хүнтэй харилцаж буй мэт харилцан яриаг өрнүүлдэг, контент бүтээх чадвар бүхий хиймэл оюун ухаанд суурилсан “ChatGPT“ чатботын өрсөлдөгч болон гарч ирж буй юм.

"Өнгөрсөн хугацаанд 80,000 ажилтан энэхүү чатботын талаар санал хүсэлтээ өгч, туршилтын явцад хувь нэмрээ оруулсан" гэж Google компанийн гүйцэтгэх захирал Сундар Пичай ажилчдад зориулсан захиандаа дурджээ.

"Ирээдүйд бид үүнийг илүү олон улс орон, хэл дээр ашиглах боломжийг бүрдүүлэхийн тулд хөгжүүлэлт дээр ажилласаар байх болно” хэмээн тэрээр нэмж онцлов.

Тус компани нь өөрийн хайлтын системээс гадна Youtube-д ч хиймэл оюун ухаант функцыг нэмэх зэргээр компанийн нэрийн хуудас болсон бүхий л гол бүтээгдэхүүн, үйлчилгээндээ хиймэл оюун ухаант чатботыг нэвтрүүлэхээр төлөвлөж байгаа аж.

Ийнхүү Google компани “Bard” чатботыг гаргаснаар хиймэл оюун ухаанд суурилсан чатботын салбарт Microsoft-той хийх өрсөлдөөн улам ширүүсэх төлөвтэй байна.

“ChatGPT” чатботыг хөгжүүлэгч OpenAI компанид олон тэрбум ам.долларын хөрөнгө оруулалт хийж буй Microsoft компани нь “Bing” хэмээх шинэ хайлтын систем болон оффисын программ, бусад үйлчилгээндээ хиймэл оюун ухаант функцийг нэвтрүүлэхээ мөн зарлаад байгаа билээ.

Үүгээр зогсохгүй “Bing” хайлтын систем болон “Edge” вэб хөтөч дээр зураг зурах хиймэл оюун ухаанд суурилсан функцийг суулгах төлөвлөж байгаа юм.

Эх сурвалж: MBC