Орон нутгийн цагаар 24-ний өдөр АНУ-ын Сангийн яам ОХУ-ын хамгийн ойрын холбоотон болох Беларусийн ерөнхийлөгч Александр Лукашенкогийн онгоцыг хориг арга хэмжээний жагсаалтад нэмж оруулжээ.
Түүний эзэмшилд байдаг Боинг 737 онгоцыг Лукашенкогийн гэр бүл гадаадад албаны болон хувийн айлчлал хийхдээ ашигладаг аж.
Хориг арга хэмжээний жагсаалтад оруулснаар АНУ-ын аливаа хувь хүн, аж ахуйн нэгжьэй ямар нэгэн гүйлгээ хийх хориотой болж буй юм. Энэ нь тус онгоцонд эд анги нийлүүлэх, засварлахад хүндрэл үүсэх магадлалыг өндөрсгөж буй хэрэг билээ.
Мөн Беларусийн хоёр том автомашин үйлдвэрлэгчийн эсрэг хориг арга хэмжээ авахаа АНУ-ын Сангийн яамны зүгээс мэдэгдэв.
Эдгээр компанийг 2020 оны Ерөнхийлөгчийн сонгуулийн дараа тайван жагсаалд оролцохыг оролдсон ажилчдыг айлган сүрдүүлсэн хэрэгт буруутгаж байгаа юм.
АНУ-ын Төрийн нарийн бичгийн дарга Энтони Блинкен энэ талаар мэдэгдэл хийх үеэрээ “АНУ нь 2020 оны наймдугаар сард болсон ерөнхийлөгчийн сонгуулийн будлиантай холбоотой хүчирхийлэл үйлдсэн Лукашенкогийн дэглэмтэй хариуцлага тооцох болно” гэж мэдэгджээ.
Оросыг дэмжигч Беларусь улс нь ерөнхийлөгч Владимир Путинтэй ойр дотно харилцаатай байгаад зогсохгүй ОХУ Украинд халдан түрэмгийлсний дараа ч хамтарсан цэргийн сургуулилт хийж байсан билээ.
Эх сурвалж: SBS