Номхон далай дамнасан иж бүрэн, дэвшилтэт түншлэлийн хэлэлцээрт (CPTPP) нэгдсэн 11 гишүүн орон өнөөдөр цахим хурал хийж, Их Британи улсын тус хэлэлцээрт нэгдэх хүсэлтийг хүлээн авсан тухай Kyodo News болон Японы олон нийтийн NHK телевиз мэдээлэв.

Тус мэдээнд дурдсанаар 2018 онд байгуулагдсан Номхон далай дамнасан иж бүрэн, дэвшилтэт түншлэлийн хэлэлцээрийн гишүүн орнуудын тоо анх удаа нэмэгдэж байгаа нь энэ бөгөөд Ази, Номхон далайн орнуудаас бусад улс орон нэгдэж байгаа анхны тохиолдол болохыг онцолжээ.

Ирэх 7-р сарын 15-16-ны өдрүүдэд Шинэ Зеланд улсад зохион байгуулагдах ээлжит хурлаар Их Британи улсын тус хэлэлцээрт нэгдэх асуудлыг албан ёсоор эцэслэн батлах төлөвтэй байна.

Их Британи улс нь Брексит буюу Европын холбооноос гарснаасаа хойш шинэ экспортын зах зээлийг баталгаажуулах зорилгоор Ази Номхон далайн бүс нутагт тун идэвхтэйгээр ажиллаж байх хугацаандаа Япон тэргүүтэй Номхон далай дамнасан иж бүрэн, дэвшилтэт түншлэлийн хэлэлцээрт нэгдэх хүсэлтээ 2021 оны 2-р сард өргөн барьж байсан юм.

Нихон Кэйзай Шимбун сонинд мэдээлснээр, Их Британи улс нэгдсэн тохиолдолд тус хэлэлцээрийн гишүүн орнуудын дэлхийн дотоодын нийт бүтээгдэхүүнд эзлэх хувь хэмжээ 12 хувиас 15 хүрч өснө гэв.

Энэхүү хэлэлцээр нь Ази-Номхон далайн бүс нутгийн орнуудын байгуулсан олон талт чөлөөт худалдааны хэлэлцээр юм. АНУ-ын ерөнхийлөгч асан Дональд Трамп бүрэн эрхийн хугацаагаа хэрэгжүүлж байхдаа Номхон далай дамнасан түншлэлийн хэлэлцээрийг орхин гарах үед Япон, Канад, Австрали, Мексик, Перу, Вьетнам зэрэг бусад гишүүн улс, орнууд анх байгуулж байжээ.

Түүнчлэн Хятад, Тайвань, Эквадор, Коста-Рика, Өмнөд Солонгос зэрэг улсууд өдгөө гишүүнээр элсэх хүсэлтээ өргөн бариад байгаа юм.

Эх сурвалж: MBC