Твиттерийн зүгээс энэ сарын нэгний өдрөөс эхлэн Twitter Blue гэх үйлчилгээгээ нэвтрүүлсэн билээ.
Уг үйлчилгээний хүрээнд баталгаажсан хэрэглэгчийн цэнхэр тэмдэг эзэмшигчид сар бүр 8 ам.долларын хураамж төлж байх ёстой болсон юм. Тэгвэл үйл явдлын хүрээнд Нью Йорк Таймс сонины зүгээс тус хураамжийг төлөхгүй гэдгээ мэдэгдсэнд Твиттер тэдний баталгаажсан хэрэглэгчийн цэнхэр тэмдгийг түдгэлзүүлжээ. Улмаар Твиттер Нью Йорк Таймс сонины хаягаас гадна баталгаажсан хэрэглэгчийн тэмдэг эзэмшдэг хураамжаа төлөхөөс татгалзсан бүх хаягийн цэнхэр тэмдгийг түдгэлзүүлсэн байна.
Гэвч Твиттер болон Нью Йорк Таймс сонины асуудал ганц тэмдэг түдгэлзүүлснээр дуусаагүй юм.
Тодруулбал, Твиттерийн гүйцэтгэх захирал Илон Маскийн зүгээс сонины цахим хаягт хандан хэд гурван хатуухан үг хэлжээ. Түүний жиргэснээр, “@NYTimes-ийн жинхэнэ эмгэнэл бол тэдний явуулга бүхий суртал ухуулгын шинжтэй зүйлс ч сонирхол татахгүй байгаа явдал”, “Түүнчлэн тэдний Твиттер хуудас нь яг л хүн суулгачихсан юм шиг, унших ч боломжгүй” гэсэн байна.
Эх сурвалж: BBC