Финлянд улс орон нутгийн цагаар 4-ний өдөр Умард Атлантын гэрээ буюу НАТО-гийн 31 дэх гишүүн орон болох нь ээ.

НАТО-гийн ерөнхий нарийн бичгийн дарга Йенс Столтенберг 3-ны өдөр хэвлэлийн бага хурал хийлгэх үеэрээ "Маргааш (4-ний өдөр) үдээс хойш НАТО-гийн төв байранд Финляндын далбааг анх удаа мандуулах болно” хэмээн мэдэгдсэн юм. Тэрээр үргэлжлүүлэн Финлянд улсыг НАТО-гийн 31 дэх гишүүнээр албан ёсоор бүртгэх 4-ний өдөр НАТО-гийн 74 жилийн ой тохиож байгаагаараа бидний хувьд “түүхэн долоо хоног” болж байна хэмээв.

“Энэхүү шийдвэр нь Финлянд төдийгүй Нордикийн орнуудын аюулгүй байдал, цаашлаад НАТО-гийн хувьд ч маш тэмдэглүүштэй сайхан өдөр болох юм”хэмээсэн байна.

Төрийн далбааг мандуулах ёслолд 30 гишүүн орны төлөөлөгчөөс гадна Финланд, Шведийн гадаад хэргийн сайд нар, Финландын ерөнхийлөгч Саули Ниинистё нар оролцох аж. Эргэн сануулахад Финлянд, Швед улсууд Украинд дайн эхэлснээс хойш гурван сарын дараа буюу өнгөрсөн оны тавдугаар сард НАТО-д элсэх хүсэлтээ гаргасан билээ.

НАТО-д элсэхийн тулд бүхий л гишүүн орнуудын зөвшөөрлийг авсан байх шаардлагатай бөгөөд ялангуяа гишүүн орнуудын парламент өргөдөл гаргагч улсын нэгдэн орох протоколыг соёрхон батлах ёстой байдаг юм. Хамгийн сүүлд үлдээд байсан Турк улс өнгөрсөн сарын 30-ны өдөр Финляндын нэгдэн орох протоколыг соёрхон баталснаар тус улс ийнхүү гишүүнээр элсэх шаардлагыг хангасан байна. Өдгөө гишүүн орнуудын соёрхон баталсан болон Финлянд нэгдэн орох протоколыг “НАТО-гийн гэрээний итгэмжлэгдсэн төлөөлөгч" улс болох АНУ-д хүлээлгэн өгөх шат дамжлага л үлдээд байгаа аж.

Үүнтэй холбоотойгоор гадаад хэргийн сайд нарын уулзалтад оролцож буй АНУ-ын Төрийн нарийн бичгийн дарга Энтони Блинкенд эдгээр баримт бичгүүдийг Турк, Финлянд улсын албаны хүмүүс өөрийн биеэр хүлээлгэн өгөхөөр төлөвлөж байна гэж Столтенберг мэдэгдэв.

Финлянд улс албан ёсоор тус гэрээнд нэгдсэнээр НАТО-гийн холбоотнууд болон ОХУ-ын хоорондох хилийн урт хоёр дахин нэмэгдэж буй юм.

Харин Оросын тал уг шийдвэртэй холбоотойгоор тэр даруй эсэргүүцлээ илэрхийлжээ. Тодруулбал ОХУ-ын Гадаад хэргийн яамны хэвлэлийн төлөөлөгч Александр Груско Финлянд улс НАТО-д элссэний хариуд ОХУ баруун хойд бүс дэх цэргийн хүчээ бэхжүүлнэ хэмээн цохон тэмдэглэснийг Риа Новости агентлаг онцлов.

Эх сурвалж: JoongAng